Xiaomi kompaniyasi Xiaomi 15 flagman seriyasining global taqdimot sanasini rasman e’lon qildi, deb xabar bermoqda GizmoChina.

Global taqdimot 2025 yil 2-martda MWC ko‘rgazmasi doirasida Barselona shahrida o‘tkaziladi.

Seriyaga ikkita model kiradi: Xiaomi 15 va Xiaomi 15 Ultra, va so‘nggi model professional darajada suratga olish imkoniyatlariga ega ilg‘or kameralar bilan jihozlanadi.

Xabar qilinishicha, Xiaomi 15 Ultra 200 megapiksellik periskopik teleob’yektiv (4,3x optik zoom) va Sony LYT-900 asosiy sensor bilan ta’minlangan bo‘lib, bu kam yorug‘lik sharoitlarida ham yuqori sifatli suratga olishni ta’minlaydi.

Ma’lumot o‘rnida: Xiaomi 15 modeli 2024 yil oxirida Xitoyda taqdim etilgan. U 6,36 dyuymli OLED ekran (120 Hz), Snapdragon 8 Elite protsessori va 5400 mA/soat batareya bilan jihozlangan, tezkor zaryadlash kuchlanishi 90 W. Global versiyada 12 GB operativ xotira va 512 GB ichki xotira mavjud.